(Bari nyangkéré di Saung Sawah)
Papan kiara ditatah
Iraha jadi lomari
Mun bisa miara létah
Pinasti salamet diri
Ninyuh ubar ku cipati
Diwadahan kana gelas
Jalma sabar éta pasti
Ku Allah dipikawelas
Kapinis hiber dipegat
Ragragna tunggul kalapa
Nu geulis ngumbar aurat
Teken kontrak di naraka
Ngala tutut ka talaga
Saladah reujeung campoléh
Lamun hayang asup sorga
Amal ibadah sing soléh
Ka mana jalan ka Jogja
Ka ditu ka Palimanan
Ka mana jalan ka sorga
Ka ditu ka Pangajian
Ka mana ngaitkeun kincir
Ka wetan katojo bulan
Ka mana ngaitkeun pikir
Ka Allah Nu Mikaheman
Lauk emas dina ganggeng
Disameran ku japati
Boga emas moal langgeng
Teu cara boga pangarti
Limun tawé jajar opat
Lawon sepré gandaria
Lamun teu maliré shalat
Luas mihape sawarga
Nurih lauk di muara
Boboko carang anyamna
Peurihna adzab naraka
Hamo kabayang ku rasa
Masing asak-asak ngéjo
Bisi tutung tambagana
Masing asak-asak nempo
Bisi kaduhung jagana
Titiran di luhur gunung
Dina tangkal saliara
Mun laku babari pundung
Nu rugi diri nyalira
Ka mana si jangkung hideung
Ka leuwi rek muru mandi
Ka mana mun mikatineung
Ka Gusti Nu Maha Suci
Tidak ada komentar:
Posting Komentar